प्रेमदिवसः

(2018तमे वर्षे प्रेमिदिवसे रचितानि कतिचन पद्यानि)

यस्य प्रेम विफलं सः इत्थम् अनुभवेत्-💔

द्रवीभवद्धस्तगतं विलोक्य

पयोहिम! त्वां दयितोपभुङ्क्ते।

द्रवीभवन्मे हृदयं कुतः सा

न पश्यति प्रेमदिनेsपि हन्त॥

एकेन चैव बहुना तनुना गुणेन

युक्तं स्वकीयहृदये धरतीह हारम्।

प्रीत्यादरादिबहुभिर्गुणराशिभिर्यो

युक्तोस्त्ययं, धरति तं न तदस्ति चित्रम्॥

पृष्ठे गतान्मुहुरपि स्वकरेण केशा

नाकृष्य या स्वहृदये विनिवेष्टुकामा।

योsयं पुरः प्रतिदिनं चरतीह तं सा 

दूरीकरोति सततं किल चित्रमेतद्।

यस्य च प्रेम सफलं स इत्थं चिन्तयेत्💘💑

शम्भौ भक्त्या निशि सुविहिता जागरेत्येष कोपात्

मन्ये तीक्ष्णैः प्रहरति भृशं त्र्यम्बकारिः स्वबाणैः।

नैतद्युक्तं तव हररिपो! सायकान् संहर त्वं

प्रत्यासन्ने मदनदिवसे प्रेमिणां क्वास्ति निद्रा॥

(2018तमे वर्षे प्रेमिदिवसस्य पूर्वस्मिन् दिने महाशिवरात्रिपर्व आसीत् )

मन्मथः पञ्चभिर्बाणैर्हृदयं मम विध्यति।

हृदयस्था  प्रिया भीरुर्भीत्या न हि पलायते॥

तथापि मनसः खेदः कुतो मे वर्धते वृथा।

मन्ये स्मरः प्रियायाश्च हृदयं विध्यतीति सः॥

प्रेयसीहृदये वासाद् स्मरबाणाः स्पृशन्ति माम्।

तां च मद्धृदये वासाद्, विशिष्टं कामखेलनम्॥

2018तमे वर्षे प्रयागे वसतो मम त्वैषा स्थितिः-

अङ्गनालिङ्गनेनाङ्गभङ्गैरिङ्गितसङ्गतिः।

सङ्गिनां, सङ्गमेsङ्गं मे तरङ्गैस्सङ्गतङ्गुणि॥